Gola

Gengið var frá sölu á Neista í dag. Hann er 10,03 m. langur, breidd 3,15 m. Vél 350 hp. Volvo.

Nýir eigendur eru Kristján og Ingibjörg.   Áhöfnin á Golu RE 945 óskar þeim innilega til hamingju með þennan glæsilega bát.

Steini og Helga, fyrrverandi eigendur Neista hafa ákveðið að hætta sportbátaútgerð, því miður.

Það hefur verið gaman að ferðast með þeim. Ég hef ekki tölu á því hvað við erum búin að vera þeim oft samferða í Breiðafjörð, Vestfirði, Ísafjarðardjúp, Jökulfirði, Strandir, Hvammsvík, Keflavík, Akranes, Arnarstapa, svo mætti lengi telja.

Kristján og Ingibjörg settu Súlu upp í kaupin. Súla verður seld.

Svo skemmtilega vill til að fyrir fjórtán, eða fimmtán árum, áttu Steini og Helga Súlu.

Hér er Súla á siglingu í Hvalfirði síðastliðið sumar.

Aðalfundur F.P.F. var haldinn á laugardaginn 23.02.13. Þar sem við erum leynifélag er ekki hægt að greina mikið frá efni fundarins. En við ákváðum að vera fúlir áfram, að hætti Íhaldsins í Guðs nafni.

Tekin var fyrir umsókn Kristjáns Kristjánssonar frá því um mitt ár 2011 um inngöngu í félagið. Ekki varð niðurstaða á fundinum. Málið verður tekið fyrir á félagsfundi í maí og metið hvort umsóknin geti fengið flýtimeðferð, enda maðurinn fúll og efnilegur. Ingibjörg kemur þar líka sterk inn.

Steini og Helga buðu fundarmönnum, ásamt mökum heim til sín í smá appelsín áður en haldið var á árshátíð félagsins.

Hátíðin var haldin á Fiskmarkaðinum. Snædd var 9 rétta máltíð og öllu skolað niður með úrvals appelsíni.

Halla og Helga. Eins og sjá má lekur ekki af þeim fýlan en það eru jú einstaka frávik....

Steini og Hafliði.

Helga og Lilja.

Óli, forseti F.P.F.

Hallgerður og Árni.

Áhöfnin á Golu RE 945 verðum á Goslokahátíð í Eyjum í sumar. Vonandi sjá fleiri félagar í F.P.F sér fært að mæta.

Þá sjá Eyjamenn tegund sem er að deyja út eða fýlupúkar.

Þó svo að sé ekki gott veður í dag, þá er óðum að styttast í vorið.

Við erum ekki enn búinn að gera ferðaáætlun fyrir sumarið, en eitthvað verður farið. Alla vega eina ferð til Eyja.

Óli Árna skipti um vatnsdælu fyrir mig í gær. Það var aðeins farið að smita vatn með pakkdós. Þá er ekki eftir neinu að bíða með að setja nýja dælu. Lekinn á bara eftir að aukast.

Annars er þetta alveg ásættanleg ending á dælunni, 25 ár.

Kristján bauð til veislu í höllinni á laugardaginn. Snæddur var góðhestur ofan úr Kjós og skolað niður með appelsíni. Ekki fór sögum af því hversu góður Skjóni var á fæti, en góður er hann í munni.

Að sögn Stjána er galdurinn við að fá svo gott saltkjöt þessi. "Salta kjötið strax eftir fláningu, meðan það er enn heitt, þá bráðnar saltið strax inn í kjötið".

Hvort það er að þakka hversu gott kjötið var, gríðarleg þekking Stjána í matvælafræði, eða að Skjóni var á góðum aldri fyrir tunnuna þekki ég ekki. 

Hér eru Kristján og Ingibjörg við bát sinn Súlu í Hvammsvík síðastliðið sumar.

Stjáni missti gleraugun sín í Reykjavíkurhöfn, tvískipt og rán dýr. Eðlilega afskrifaði hann gleraugun strax. Frúin var ekki á sama máli og fór að dorga eftir þeim með veiðistöng. Eftir rúma klukkustund komu gleraugun upp.

Það er víðar en í pólitík sem getur skilað ótrúlegum árangri að dorga í gruggugu vatni.

Súla á siglingu inn Hvalfjörð.

Halla og Gola RE 945 fóru á flot í gær, 31.03. Þá er vorið komið. Við áhöfnin á Golu fluttum um borð í morgun.

Lífið er aðeins að kvikna hér í Suðurbuktinni. Í tilefni dagsins verður veisla í kvöld. Vonandi verður tækifæri til að ná í svartfugl næstu daga.

Nakki var að taka olíu í morgun. Þessi bátur lenti í miklum hrakningum suður af Vestmannaeyjum fyrir nokkrum árum.

Síldin RE 26 Eigandi Garðar Björgvinsson. Garðar er frá Raufarhöfn, eins og ég.